सिंगापूर- नित्यनूतन नगर

फारा वर्षांपूर्वीची गोष्ट! 'संग नील उत्तम' शिकारीला निघाला होता. शिकारीसाठी पुढे जात जात तो एका नव्या प्रदेशात येऊन पोचला. तिथे त्याला एक अगदी वेगळाच प्राणी ओझरता दिसला. त्याला वाटले तो सिंहच आहे आणि म्हणून त्याने त्या नव्या प्रदेशाला नाव दिले 'सिंगापुरा '. 

हे नाव आले होते संस्कृत शब्द सिंह आणि पुरा म्हणजे गाव, शहर ह्यावरून. सिंहपुर, सिंगापुरा!

'संग नील उत्तम' होता श्रीविजय साम्राज्याचा राजपुत्र. इतिहासाला तो 'श्री त्रि बुआना' म्हणून देखील ज्ञात आहे. श्री त्रि बुआना ही त्याची पदवी होती, अर्थ होता श्री त्रिभुवना - स्वामी तिन्ही जगांचा!

शतके लोटली. राज्यकर्ते बदलले. अनेक राजवंश प्रसिद्ध झाले आणि लुप्तदेखील झाले. सिंगापुरा अगदी मोक्याच्या जागी असल्याने मालवाहतुकीसाठी, व्यापारासाठी महत्वाचे बंदर म्हणून नावारूपाला आले. 

मग सिंगापुराचे सिंगापूर कसे झाले? नेहमीप्रमाणे ह्या बदलाचे कारण होता एक ब्रिटिश अधिकारी सर थॉमस रॅफल्स. त्याने १८२२ मध्ये सिंगापुरा जिंकले आणि ब्रिटिश साम्राज्यासाठी एक व्यापारी बंदर म्हणून हा देश विकसित केला. जेते आपल्याला हवे तसे जिंकलेल्या देशाचे नाव बदलतात हे जगजाहीर आहेच.. तर असे झाले सिंगापुराचे सिंगापूर. 

त्या नंतर सिंगापूरने अनेक उतार चढाव अनुभवले. दुसऱ्या महायुद्धात जपान्यांनी आक्रमण केले आणि ब्रिटिशांकडून फेब्रुवारी १९४२ मध्ये सिंगापूर हिसकावून घेतले. तीन वर्षांनी चक्र फिरले, जपानला शरणागती पत्करावी लागली आणि सिंगापूर पुन्हा एकदा ब्रिटिश अंमलाखाली आले. 

परिस्थिती सतत बदलत राहिली आणि अखेरीस ९ ऑगस्ट १९६५ ला सिंगापूर स्वतंत्र झाले. जरी स्वतंत्र देशाचे नाव अजूनही सिंगापुरा नसून सिंगापूरच असले तरी राष्ट्रगीतात मात्र बेरजया सिंगापुरा ( सिंगापुरा यशस्वी होवो. ) 'बेरजाया 'मलेशियन भाषेतील शब्द असून त्याचे मूळ बहुतेक संस्कृत मधील 'विजयी ' हा शब्द असावे. सिंगापुरा हा उल्लेख अजूनही एकदा येतो राष्ट्रगीतात, तो म्हणजे 'मजुला सिंगापुरा '. त्याचा अर्थ आहे सिंगापुरा सतत पुढे जात राहो, विकासमान होवो. सिंगापुरा हे नाव अशा रीतीने नागरिकांच्या मनात रुळत राहते. 

स्वातंत्र्यप्राप्तीपासून ते आजपर्यंत सिंगापूरने खूप मोठा पल्ला गाठला आहे. आज सर्व उद्योगांना आपले ऑफिस सिंगापूरमध्ये असावे अशी निकड भासते. जगातील सर्वात मोठ्या मालवाहू बंदरांपैकी एक, जगभरातील प्रवाशांचे आवडते ठिकाण अशी आणि अश्या अनेक ओळखी निर्माण करून सिंगापूर, हा छोटासा लाल ठिपका जगाच्या नकाशावर अभिमानाने झळकत आहे. 

सिंगापूर असा देश किंवा खरे तर असे शहर आहे, जिथे सतत काहीतरी बांधकाम चालू असते. मग ती नवीन रेल लाईन असेल, नव्या इमारती असतील किंवा प्रवाश्यांसाठी नवी आकर्षणे निर्माण करणे असेल, बांधकाम सतत चालू असते. सतत बदल हीच इथली न बदलणारी गोष्ट आहे! 

आम्ही जेव्हा सिंगापूरला २००५ मध्ये आलो होतो तेव्हा मरिना बे सँड्स आणि गार्डन्स बाय द बे दृष्टीपथात पण नव्हते. तेव्हा सिंगापूरचे चिन्ह असायचे मर्लायन आणि एस्प्लनेड. चला सिंगापूरच्या सफरीला अशी प्रवासी कंपन्यांची पत्रके असायची त्यावर देखील ह्याच दोन्हीचे फोटोज असायचे!! 

Esplanade
P.C. Sneha Tilak 

Merlion
P.C. Sneha Tilak 

आता सिंगापूर फ्लायर - जायन्ट व्हील, मरिना बे सँड्स, स्काय पार्क, इन्फिनिटी पूल, गार्डन्स बाय द बे, आर्टस् अँड सायन्स म्युझियम्स... इतकी सारी नवी आकर्षणे आहेत. प्रवासी कंपन्यांना सतत आपली सिंगापूर माहितीपत्रके बदलत राहायला लागत असणार!! 

ही सध्याची म्हणजे फेब्रुवारी २०२२मधील सिंगापूरची स्कायलाईन.

 

Trying to capture Singapore Skyline
P.C. Sneha Tilak 

 

खूप जोरदार वाऱ्याचा आणि ढगाळ आकाशाचा दिवस होता तो. पण वातावरण मात्र अगदी प्रसन्न होते. वरच्या फोटोत मी जो विडिओ काढते आहे तो हा - 

https://youtu.be/DbfsVB6eqYk

Merlion

Reflections! 

Near Arts and Science Museum. 

Marina Bay 

Arts and Science museum and Marina Bay Sands ( 2015)

Cloud Forest and Singapore Flyer ( 2015)

Cloud Forest and Flower Dome 
Gardens By the Bay 2015

Making Of Super Tree Grove (2015)

Super Trees Grove ( 2022) 

जगभरातून येणाऱ्या पर्यटकांना सतत नवनवीन पर्यटन केंद्रे तयार करणारे, नित्यनूतन भासणारे सिंगापूर भुरळ पाडते ह्यात शंकाच नाही. ह्या आकर्षणाखेरीज आणखी सिंगापूर ज्यांना पाहायचे आहे अशा निसर्गप्रेमींसाठी अनेक तलाव आहेत, बागा आहेत. ज्यांना इतिहासाची आवड आहे त्यांच्यासाठी दुसऱ्या महायुद्धाशी संबंधित अनेक ठिकाणे आहेत. काही अनेक शतकांपूर्वीचे सापडलेले अवशेष आहेत. 

काही कॅसिनोज आहेत, अनेक मॉल्स आहेत, शेकडो बार आहेत आणि हजारो उपहारगृहे आहेत! थोडक्यात काय तर प्रत्येकाला आपापल्या आवडीप्रमाणे बघायला, आनंद उपभोगायला सिंगापूरमध्ये काहीतरी आहेच! 

जेव्हा सिंगापूरवर इतक्या सगळ्या ब्लॉग पोस्ट्स आत्तापर्यंत लिहिल्या गेल्या आहेत, पर्यटकांनी लिहिलेले लेख आहेत, अनेक व्हिडिओज आणि फिल्म्स आहेत, अनेक चित्रपटांतून सिंगापूर दिसलेले आहे, तेव्हा मी माझ्या ह्या सिंगापूर सिरीज मध्ये नवे काय लिहिणार असा प्रश्न पडला असेल ना?! तर मी लिहिणार आहे, माझ्या नजरेला दिसलेल्या प्रसिद्ध सिंगापूराविषयी तसेच त्यातील काही कमी प्रसिद्ध ठिकाणांविषयी... तेव्हा वाचत राहा - सिंगापूर सिरीज. 

#WhatToSeeInSingapore #SingaporeTravel #GoSg #SingaporeAttractions #ExploreSingapore